Messi AFA-dan adının və fotosunun kommersiya istifadəsini dayandırmağı tələb edəcək
AZƏRTAC İspaniyanın “Marca” nəşrinə istinad edərək bildirir ki, “İnter Mayami” futbolçusu Lionel Messi Argentina Futbol Assosiasiyasından (AFA) adının, fotosunun və görüntülərinin kommersiya məqsədilə istifadəsini dayandırmağı tələb edəcək. “Marca”-nın iddiasına görə, Messinin hüquqşünasları tərəfindən hazırlanmış rəsmi sənəd AFA-nın baş ofisinə göndəriləcək. Bildirilir ki, qərar AFA ətrafındakı maliyyə qalmaqalları və qurumun Messinin kommersiya tərəfdaşları ilə fikir ayrılıqları ilə bağlıdır.

Bu nə deməkdir?
İddiaya görə, Messinin narazılığına AFA-nın Argentina pivə markasına onun fotosunu şüşələrin üzərində yerləşdirməyə icazə verməsi səbəb olub. Messinin ABŞ-nin pivə istehsalçılarından biri ilə reklam müqaviləsi var. Bu vəziyyətin onun beynəlxalq sponsorlarla münasibətlərinə mənfi təsir göstərə biləcəyi vurğulanır.
Bizdən qeyd · Görünür, bu dəfə mübahisə meydanda yox, pivə şüşəsinin etiketində gedir.



